【勁過阿希】示愛撞著人夫 森美:我都唔知Lucy點
2017年07月29日07:00

森美小儀喺商台叱咤903嘅節目《早霸王》,入面有個環節係幫人告白!呢日就有個女聽眾打電話上去,點知就搞到森美小儀沉默咗一陣!

講緊係女聽眾Lucy,希望森美同小儀幫手向一位識咗差唔多八年嘅朋友告白,Lucy話佢哋係讀夜校嘅時認識,之前個男仔都試過表白,但佢因為自己冇試過拍拖而拒絕,兩人一直有聯絡,Lucy亦對佢有好感,所以希望可以係節目度表白。

森美、小儀之後就打畀男主角Bosco,森美話:「有位朋友打嚟叫我哋打俾你,聽聞你好事近,生日喎!平時有冇拍拖呀?」Bosco就話冇,於是森美直接嚟料:「咁就有個女仔打電話嚟,就話鍾意你,要同你表白,你估唔估到佢係邊個呢?」

正當大家以為Bosco會講出Lucy個名時,Bosco竟然話:「哦~如果唔係我老婆可以唔使聽㗎喇。」然後,全場靜咗足足三秒!小儀再問:「你幾時結婚㗎?有冇小朋友呀?」Bosco就話:「好耐喇,有小朋友喇。」

事情去到呢度,森美、小儀唯有收線,森美仲一路感嘆:「勁過阿希啊!」森美接受傳媒訪問時話,唔知Lucy之後係點:「我就真係唔清楚,做完節目出嚟佢收咗線,我覺得佢應該堅強,努力向前搵下一個目標。」

至於所謂「勁過阿希」,其實係好多年前,有男聽眾打電話希望向阿希示愛,點知呢個阿希原來係男仔,搞到森美同小儀當時都呆咗一陣,森美仲話:「我當時個腦都停咗幾秒鐘!」

關注我們Facebook專頁
    相關新聞
      更多瀏覽