27°C
油價反覆，但整體升多過跌，大班駕駛者叫苦連天，想做個有車一族，車價、（停車）場租好被動話唔到事，但慳油嚟講就相對主動好多，識玩嘅一年慳幾千銀唔係難度。難怪坊間慳油貼士五花八門，老師傅、專業車手、甚至科研分析，究竟邊D有效，邊D又無效，有D講法唔止完全相反，有D仲存在風險不可以亂試！
(source：National Computational Infrastructure)
暖車？我覺得可以 VS 我覺得不行
關於暖車（或熱車）是貼士還是謬誤？！在坊間大家一講起，就好容易爭論到紅到面晒。在大多數人的觀念中，冷車啟動後，為咗令引擎更平順運轉，覺得要用數分鐘暖車（特別係冬天、一大早或長時間無用車之後）。但事實係，雖然暖車後的耗油量會減少，但暖車5分鐘一樣會消耗160cc左右的燃料，所以整體的耗油量還是會增加。
(source：中國有嘻哈)
但唔使花幾分鐘暖車，啟動後馬上出發，又確實係慳時間又慳油，不過就唔係叫大家一上車就猛力踏油門向前衝。堅持需要暖車一派就話，依家大部分車款雖然都採用多點燃油噴射系統，唔需要長時間原地暖車，但花數十秒等偈油稍為升溫以及流動，一開頭先以低轉低速行駛數分鐘，等其他潤滑油流動，以及令引擎到達工作溫度（一般約 80˚C 以上），然後再正常駕駛，引擎會容易保持到最佳狀態咁。係，的確唔會因暖車慳到油，但係一個良好保養習慣，車耐用D，照樣慳到！
(source：中國有嘻哈)
車快風阻大 = 用油多
其實一早已有晒測試和數據講，以中速穩定行駛係最慳油！一般車款平均去講以時速50至70公里行駛，不但相對安全，也較慳油。太快會嘥油唔難理解，當車速愈快，風阻愈大，用油自然多。另外，轉速超過 2500 轉甚至 3000 轉以上，同樣會增加耗油。因引擎氣閥開合加快，做成換氣效率降低，摩擦阻力增加，影響燃料轉變為機械動能的過程。
太快唔得，太慢都嘥油？
又要再重覆一次，中速穩定行駛係最慳油，如果唔計個別技術、汽車輕量化設計、低風阻係數等先決條件，我們係可以計出最省油的行駛速度。美國的能源部和環境部，每年都會發布一次汽車燃油效率指南，用嚟指導大家點先可以慳油以降低環境污染。每年呢個「最省油的行駛速度」都係大約時速50至60公里到。
(source：United States Department of Energy)
至於太慢點解都會嘥油？原因係當汽車低擋低速行駛時，來自地面的摩擦力以及空氣的阻力都比較小，引擎負荷率相對較低，消耗的汽油並沒有全部用來作能力，而是廢咗
係汽車內部的損耗或散熱上，所以有效油耗並不高，俗稱「嘥油」！
(source：mingczh.com)
仲用空檔落斜
經過好多人講之後，我諗依家應該都無人覺得空檔落斜係應該做的事吧。為免大家唔記得，這裡當然要講多次，耗油量的確係減少，但落斜時需要完全倚賴腳掣控制車速，長時間踏腳掣，會令煞車皮產生高熱，令表面氧化，導致摩擦力降低，減低煞車效能，唔單止可以因小失大，慳了油輸了保養，仲有機會發生意外。專家教路，可改用低檔，利用引擎運轉的阻力，減少對腳掣的倚賴。
(source：upower)
唔開冷氣更嘥油？
係，無錯，有一種情況係行駛時唔開冷氣更嘥油，答案就係高速行駛時候。唔開冷氣開窗係一般情況係可以降低引擎負擔，也減少耗油。但一旦你在高速公路，或需要高速行駛時，唔開冷氣開窗反而增加油耗，原因係風阻也跟著增加，除非空調壞掉，高速行駛最好是關窗開空調。
(source：Pinterest)
跟車太貼都關事
剛剛講過話要穩定速度行駛最慳，突然加減速都好耗油，數據去講急加速或急煞車，在市區行駛車輛大概會增加約5%的油耗。理論係，原則上，汽油主要作用是推動車輛，引擎一直轉，你一直唔踩 Brake，就能用盡汽油。相反講，你每次踏腳掣煞車，汽油便等於白花了。非官方統計，對於心急的香港人猛力踩油門同 Brake，係行車耗油量大增主要原因之一。
(source：Mazda2)
停車唔熄匙唔關環保事 關你荷包事
其實，sell停車熄匙一直講環保係「錯誤」方法，同香港人講「荷包VS環保」，當然是前者肉痛D！據業內人士講，當汽車引擎處於怠速運轉時候，每5分鐘的耗油量，約相等於駕車行駛一公里左右。所以下次熄匙停車，唔使太偉大原因，你係為你自己。
(source：Toyota Prius)
入半缸油 = 懶醒？！
又唔一定錯晒，重量少D，用油愈少，理論正確，但事實係一輛普通私家車，連司機約坐5人，車輛總重量大約1400公斤。而油缸容量大約50公升，入滿油，油重量只是約40公斤，如入半缸油，省下的重量只有20公斤而已，相對一輛1400公斤的車輛而言，比例太細，效果輕微。你還要增加來回油站次數，有無慳到真係好則見仁見智。相反，同一理論，想減磅慳油，不如勤清理行李廂，清走不必要的雜物，更有效減輕車子負載量，就樣仲實際！
(source：Pinterest0)
當然，呢8招就唔係咩隱藏秘技，但好多車主都諗唔明，一來可能知個表面，又知背後原論，今次一次講清楚大家可以留在身邊旁身。而然，除日常駕駛習慣同態度，重有好多方式可以慳油，好似對於汽車的保養工夫就唔可以馬虎，像每月一次Check Check胎壓，是否恰當，亦是行車耗油量是多是少的關鍵！事關胎壓不足會增加行車阻力，令耗油量大增，若然日常保養得法的話慳油自然更得心應手！
(source：Pinterest)
(0)
這篇文章 【 #慳油 】慳不小心就變老襯 最早出現於 MENTALK 有班男人。
