呢期晚晚10點半打開電視，都見到森美喺大台介紹日本，教大家慳錢之餘，仲慷慨騷肌肉，順便騷埋佢啲暖男技，但最令人深刻嘅，唔止喺佢啲胸肌，更加係日落下嘅果兩滴眼淚，原來森美仲係愛妻號。入行23年嘅佢，成日見到佢聽到佢，究竟你又有幾熟悉佢？佢又有幾千奇百趣？即刻睇森美千奇百趣5件事！ 千奇百趣1：點解叫森美？ 好多人都知，森美原名梁志健，英文名Sammy。原來森美最初入行之際，商台幕後人員將佢個英文名Sammy讀成「森美」，自此森美就成為佢嘅藝名，好多節目都直接用「森美」，例如「森美心思思日記」、「森美變態樂園」、「森美小儀dot dot dot」、「森美小儀山寨王」、「森美移動」等等。當然，卡通片《森美海底歷險》，佢一樣聲演番「森美」呢個角色啦。 千奇百趣2：出道同「鬼王」潘紹聰合作？ 誓估唔到，森美第一個開咪嘅節目，竟然唔係同小儀，而係同「鬼王」潘紹聰！而且，果個節目仲係叫做《青蘋果與紅提子》，朝早6點至7點，聽個名就知係好嘢。有趣嘅係，聽講有人而家問番「鬼王」，佢扮唔記得主持過呢個咁千奇百趣嘅節目呢！ 千奇百趣3：同孫耀威係兩兄弟？ 森美一直都自稱係公子，學歷有番咁上下，佢分別喺聖士提反書院、喇沙書院同中大新亞書院讀過，當年會考25分畢業，仲同當時喇沙同學孫耀威，封為「中大雙雄」，兩個青靚白淨嘅高材生殺入中大，迷倒不少少女咁話，後來孫耀威入行做歌手，森美就參加商台DJ選舉比賽「叱吒殺戮新大陸」而入行。 千奇百趣4：點解老婆咁低調？ 當年DJ選舉比賽，唔單止幫森美正式入行，仲令到佢認識咗佢老婆Veronica，只不過森美成日都話老婆唔係圈中人，所以一直唔提佢，好低調。話說，其實Veronica都算係半個圈內人，因為佢曾經係童星，曾經同歌神許冠傑喺1984年拍電影《全家福》，後來又喺有線兒童台同商台做過。 千奇百趣5：森美有一仔一女？ 據資料顯示，森美喺2000年結婚，有一仔一女，哥哥叫Lancelot，今年15歲；妹妹叫Charisse，芳齡11歲，之前三個人仲一齊出鏡做訪問！仔女都有遺傳到森美嘅幽默感，阿仔話唔鍾意聽森美做電台節目，覺得佢講嘢好悶，阿女就話唔鍾意佢咁大隻，覺得咁大隻著埋衫好奇怪，好好笑！ 延伸閱讀：獲網友封為「性博士」！貼地港姐馮盈盈《後生仔傾吓偈》夠放 延伸閱讀：大解謎！好女仔點解冇拖拍

Related Articles

王貽興專欄：夫妻恩愛的秘訣

我們結婚吧！完美愛人的 6 大特徵

王貽興專欄：裝可愛的女人