演員的自我修養 林淑敏
2018年05月03日12:30

這篇訪問,擺明是圖文不符的。

整輯照片中的「大小姐」林淑敏,那些鬼馬輕佻的表情和甫士,全都只是為了令畫面看起來更豐富好玩配合而做;真實的她,本來是個性格為人友善平和,舉止談吐斯文有禮的人,難怪她早前失落了《萬千星輝頒獎典禮》「最佳女配角」一獎後,仍然大獲網民力捧,指她是「民間最佳女配角」。

「處境劇不嬲都比較少有提名,我自己都盡咗力交咗功課。公司女演員唔少,拍劇嘅數量又唔少,我可以係二十個女配角提名嘅其中一個,仲要有埋入『五強』嘅bonus,我做咗咁耐戲,都冇試過可以有呢啲肯定,所以對我嚟講,已經好滿足、好有交代!」

是真的,現年四十一歲的她,自○二年加入無綫以來,一直都只是默默演繹着那些不甚起眼的綠葉角色,要不是一一年被傳媒揭發了她患上乳癌,大概她就如很多滄海遺珠的「小角色」演員一樣,沒幾多人能說得出她的名字。

「我從來都冇擔心過人氣嘅問題,我病之前都冇人氣o架啦!有個同事朋友講得好啱o架,佢話:『o依家有人畀埋錢你做自己鍾意嘅嘢,係咪應該更加要好好珍惜呢?』咁又係喎,我真係算好好彩嘅一個呀!」

但見林淑敏這天趁着拍劇空檔接受這個訪問,整日於將軍澳工業邨匆匆來回電視城和敝公司,即使臉上略見疲態,訪問後依然笑着跟同事們合照,正正身體力行做好呢份工——真正演員的自我修養,她就是個人辦。

撰文☆周彩霞 攝影☆蔡豪 設計☆美術組

係愛呀哈利

只要知道林淑敏本來是個前言所形容的人,便會明白她的而且確「演活」了《愛‧回家之開心速遞》中,那個巴辣霸道的「大小姐」——一個跟她性格完全相反的角色。

「我初初睇到個劇本,都覺得呢個角色有啲難度o架,但劇組好好,幫咗我好多,監製畀咗好多意見我,同我對劇本,又話畀我聽邊句嘅語氣應該要點做,仲讀埋啲語氣畀我聽,佢想要啲乜嘢,又話埋畀我聽應該點行、應該點坐,講咗一、兩次畀我聽之後,我大概get到佢要啲乜嘢,咁我就一直到o依家都捉住呢個tone嚟做。」

令她感到意外的,是這個角色竟得到網民的青睞,慢慢成為了網上熱話,網民的激讚留言,佈滿了大小討論區。「最開頭係公司啲同事同埋朋友WhatsApp畀我睇,劇裏面做我細佬『Terry』嘅李偉健,又教我睇邊幾個討論區,哈哈!睇到啲網民嘅comment,真係好感動o架!

「最記得有次我睇到個討論區講我嘅病,跟住有網民話:『林淑敏為香港帶嚟咁多歡樂,我哋真係要祝福佢身體健康!』嘩!睇完我真係想喊!」

正因為現實中的她友善平和,所以多年來在公司人緣很好。「公布咗我被提名之後,好多人都話想我攞,我覺得佢哋呢啲係愛、係關心囉!哈哈!」

▲《愛•回家之開心速遞》中的「大小姐」,獲網民大讚兼力捧,林淑敏說,單看那些留言已夠感動。「我開始了解到觀眾想要乜,我就做番佢?想睇??,感覺好親密!」

▲一月廿一日晚,她憑「最佳女配角」提名,出席《萬千星輝頒獎典禮》。「我係之前一日先出去揀衫,人哋仲肯花兩個鐘幫我改衫,我以後都唔可以咁呀。」

網上最奪目

林淑敏小時候成長於觀塘順安邨,對上有兩個哥哥,十一歲時隨母親移民加拿大多倫多。「我喺嗰邊讀第九班(約中三),跟住就讀埋大學,第一年讀Art,然後就轉咗科讀電影——不過好多人都以為我係讀Business,哈哈!」

千禧年畢業時,她send了信到無綫和很多製作公司應徵,打算回港做幕後。「無綫叫我見p.a.,我咪飛返嚟香港囉。最記得第一次見,我着咗條裙去,人事部嗰個人由頭望到我落腳:『我哋啲p.a.冇咁斯文o架喎!』哈哈!後來見埋第二次,佢哋都係冇請我,可能嗰陣啱啱亞視close咗製作部,我見工嘅對手,亞視嘅又有,港台嘅又有,佢哋唔留意一個fresh grad係正常嘅。」

製作助理做不成,她便轉去當空姐。「但係我真係好想入行,好想做自己讀嘅嘢,所以做做吓空姐,我就去咗選港姐。」那年冠軍是劉慧蘊,她自己則獲「網上最奪目小姐」獎。「嗰陣十幾年前呀,大佬!根本都唔係好興上網嘅,哈哈!」

三甲不入,輾輾轉轉卻入了娛樂圈。「我參選完就入咗間製作公司做幕後,幫啲日本電視台拍旅遊節目,拍攝、統籌同剪接都一腳踢。後來我想搵多啲錢,就做埋part-time model,○二年就簽咗畀TVB——我嗰屆嘅港姐,到o依家只係得番我同簡慕華仲喺呢行做。」

▲千禧年參選港姐,獲「網上最奪目小姐」獎。「其實嗰陣唔係好興上網?,十幾年前喎!大佬!」

打到第三針

加入無綫後的首套劇集是《談判專家》,做蔡子健飾演的「楊孝武」的前女友「Joyce」;隨後她都是劇接劇未停過。「做乜嘢角色呢?做雞做鬼做嘍囉做村民做市民做二奶……哈哈哈!」她一口氣笑著說。「呢啲角色,套套劇都要架嘛,所以我?無?多job?,年年爆騷囉,搵到食、夠生活嘅。」

有為過演這些「小角色」感到心灰意冷嗎?「都有試過覺得自己好冇用,都有諗過轉行架。但當每日都要面對自己生活時,又唔會特別為呢啲嘢有愁緒喎;有人畀埋錢我,做我自己鍾意嘅嘢喎!同埋人愈大,惰性就愈重,哈哈!跟住就一份約又一份約咁(續),『好啦、好啦!』就十幾年。」

一○年,林淑敏確診患上乳癌。「喺正胸骨上面,凸起咗一嚿,唔睇醫生唔得。驗咗係乳癌裏面最惡嘅一種,要化療、電療、打十八針標靶藥,三個禮拜一針。我記得我打化療針打到第三針,我都仲拍緊《依家有喜》,做郭政鴻其中一個女朋友,當時我只係同燶監製同埋郭政鴻講,萬一我出咗乜嘢事,佢哋都唔使內疚嘛。不過第三針之後,我覺得自己唔係好得,就喺屋企休息。」

▲一○至一一年患病期間,她曾因化療,導致所有頭髮脫落。「呢啲副作用,我知會過去,啲頭髮會生番出嚟,所以我唔擔心。我反而擔心休養完出番嚟,仲有冇人想搵我做嘢,結果公司對我好好,安排咗我主持《都市閒情》。」

▲她坦言,治療癌病中段時的副作用,令她感到最難受。「生理上有好多不適。好彩我心理上,一直都有我嘅信仰撐住,我有乜嘢唔開心,都會睇聖經搵答案。」

攬住我老公

至於家人,本來只有她從事建築材料生意的另一半陳中原知道。「我啲屋企人都喺晒多倫多,香港冇乜親戚,係攬住個老公囉!哈哈!」但打到第三針時,母親卻要回港參加表妹婚禮,她不能不告訴她。「點知我媽咪聽完,出奇地平靜。」

癌症最終於治療了年半後康復。一三年,她更與陳中原結成夫妻。「我不嬲都唔想結婚,覺得一齊咁多年,意義唔大,而且我唔能夠有BB,因為我好番之後嘅五年觀察期,都要食荷爾蒙藥。食完五年,醫生話,而家嘅標準係食十年,唔食嘅話,復發風險好高,但我可以停食,選擇生BB。我自己都諗咗一陣,因為我鍾意細路仔鍾意到黐線!返去問老公,佢決定得好快,叫我繼續食!佢唔想為咗生小朋友嘅問題,令到我嘅健康有威脅。我老公真係好好!我冇識錯佢!好彩識到佢!」

兩人相親相愛十七、八年,三月廿四日便是結婚五周年紀念。「咁多年嚟,我哋都經歷過大家嘅低潮,我哋嘅相處係,知道對方有困難同軟弱時,可以盡量去協助對方,呢樣嘢好重要!所以十幾年嚟,佢都冇送過花畀我,我一樣OK架!哈!」

陳生,結婚五周年當日,識做啦!

▲一三年三月廿四日,正處於乳癌觀察期的她,跟拍拖十多年的陳中原拉埋天窗。「我老公講得啱,結婚的確可以令我哋嘅關係更進一步,如果可以早啲結就更加好!」

身體最健康獎

因為「大小姐」一角人氣急升,林淑敏說,她是為此高興和感動的,但也不是沒有隱憂。「我驚人會覺得我消費緊我嘅病,因為我成日都講。」

這當然是她想多了,畢竟通常都是由傳媒提問,要求她說的,明眼人都會知,不是她以此來做新聞、博見報吧!「都係嘅,如果我收埋唔講,我就要?住呢個秘密一世喎!𠵱家我坦白,都可以畀大家對呢個病認識多啲,叫做幫我呢個病做緊嘅service呀。因為我病嘅時候,我唔知應該要點處理自己,搵資料搵得好辛苦呀!」

心地如此好,所以,這個訪問,大家決定即場頒一個小獎盃給她,以彌補她那失落的「最佳女配角」獎。

「如果要我決定呢個獎盃係乜嘢獎,我會話係『身體最健康』獎!我自己都驚會復發架!所以如果可以keep住冇事嘅話,我真係好希望一路都會有好好嘅身體狀態,去應付我嘅日常生活。」

那就承你貴言吧!

關注我們Facebook專頁
    相關新聞
      更多瀏覽