21°C
又到年尾，最令香港樂迷期待的一定是，想快啲知道自己的偶像會否在明年舉行演唱會。有幾位久違香港舞台的歌手亦相繼宣佈了演出日期，唔知邊位歌手的演唱會你最想睇呢？
檔期：2019年1月
歌手：張學友
2019年，打頭炮的是在90年代紅透半邊天的四大天王之一張學友。由2016年起「A CLASSIC TOUR」世界巡演已經走過美洲、歐洲、亞洲、大西洋，至今已完成191場演出，如果計埋尾站香港的演出，整個tour將突破220場，成為學友做巡演最長的一回。雖然學友已經57歲，但絕對無影響到佢嘅唱功，依然聽出耳油，每首金曲都係經典之作！
檔期：2019年2月
歌手：鄭中基
鄭中基就喺農歷新年期間舉行個唱「One More Time」，他希望今次的反應同上次一樣咁好。而今個演唱會的主題是關於愛和希望，幫全港市民打打氣，他更揚言話寶貝女已經揀咗首歌將會同佢喺個演上合唱，真叫人期待。Ronald在2019年除了要忙著準備演唱會事項，他還要忙著親自執導《龍咁威》第三集，希望帶來更多笑點給廣大支持港產片的影迷。
檔期：2019年2月中
歌手：鄭伊健
數數手指，Ekin對上一次單拖開show已經是2012年了。早前Ekin生日，許願時說生日願望是「再上舞台！」，現在他的願望真的成真了。雖然Ekin近年事業重心多放於拍戲方面，音樂作品減產，所以一眾等到頸都長的粉絲一聽到這個消息，一定拍爛手掌。到時大家記得扣好安全帶，跟住Ekin頭搖又尾擺！
檔期：2019年3月中
歌手：Dear Jane
樂隊Dear Jane成軍15年，終於上到紅館舞台喇！近年他們憑著愛情三部曲《哪裡只得我共你》、《只知感覺失了蹤》和《經過一些秋與冬》及其他情歌人氣急升，引起好多情侶的哄嗚。剛宣佈這個消息的他們，已經急不及待跟大會導演開會傾細節，希望與過往的音樂會有所不同，想給粉絲們感受一個不一樣的音樂體驗！
檔期：2019年3月尾
歌手：許廷鏗
相信在紅館開個唱一定是每位歌手的夢想，所以又難怪Alfred早前在麥花臣的音樂會上，喊住口咁透露自己將會在2019年3月舉行自己第一個處男個唱啦。經典歌曲和新歌《碼蟻》、《演員的自我修養》、《青春頌》又點會在個唱上欠呢？
檔期：2019年4月
歌手：I Love You Boy'z
艾粒都算是香港首席騎呢搞笑組合之一，二人一合體就大放笑蛋，逗得一向工作壓力好大嘅香港人笑到流眼淚。2019年就係佢哋成立17週年，亦是第一次在紅館舉行演唱會。艾粒表示今次演唱會唔想好似以往的音樂會咁，所以會以talk show形式去搞，相信一定唔會有冷場！唔知特別嘉賓會唔會請到和他們一起主持過電台節目《口水多過浪花》嘅Do姐呢？
檔期：2019年4/5月
歌手：方大同
方大同 「Throw It Off 靈心之子 」巡迴演唱其實已經在2018年喺大陸開始了。這位樂壇小教父近年甚少在香港露面，不過日前大同就向粉絲們大派定心丸，宣佈巡演會有香港站，Yeah! 相信到時又會掀起搶飛風波喇！
檔期：2019年7月
歌手：鄭秀文
樂壇天后Sammi已經對粉絲們宣佈，她將於2019年7月舉行演唱會，這對於粉絲們(包括小編)來說絕對是一個好消息！Sammi揚言今次演唱會絕不是part 2，而是會加入全新概念在其中，務求令粉絲們在演唱會上得到視覺和聽覺的享受。不過到時一定好難買飛啦⋯⋯
檔期：2019年8/9月
歌手：許志安
Sammi老公許志安亦會跟著老婆的步伐，在8或9月開演唱會！安仔對上一次在紅館開show 已經係2015年，他還表示今次入紙申請咗兩次先成功，所以想把最好的一面呈現給樂迷。唔知安仔會唔會請老婆做嘉賓，合唱返首《其實你心裡有沒有我》呢？
檔期：2019年8月(待確定)
歌手：容祖兒
Joey 早前出席活動時，就透露了自己已經向紅館入紙申請明年開個唱。因為2019年就是Joey 入行20週年，所以她特別想在這個重要日子開演唱會慶祝，不過確實日期就有待宣佈和確定。
檔期：2019年年尾(待確定)
歌手：謝霆鋒
霆鋒白1996年入行，不過真真正正自己的tour就只有一次，就係2000年紅館的「Viva Live」，之後就再沒有舉行過正規tour，所以粉絲們就餓足18年......不過日前霆鋒接受某傳媒訪問時，就親口證實將會在2019年(或者最遲2020年)開個唱！如果真係開得成，相信呢個演唱會將會是明年的樂壇焦點之一。不過要買到飛，真係要諗諗計。
每一個將在2019年開演唱會的明星，真係一個勁過一個。唔知你會最想睇邊個演唱會呢？
Edit: Joey
Photo:網路圖片
