《全民造星II》再造香港傳奇!十大節目最受關注超新星
2019年12月02日00:00

香港人,齊追星

ViuTV爆紅選秀比賽節目《全民造星》第一季極受歡迎,姜濤亦都因為呢個節目紅咗,成為新一代香港男神。2019年9月《全民造星II》正式播出,由眾多參加者選出99位好有才華嘅表演者,開始咗一場龍爭虎鬥,表演者各展所長,又唱又跳,已經引起好多人Follow做Fans,香港未來嘅大明星,你又睇咗未?《全民造星II》好快推出新嘅娛樂圈新星,要做新星最緊要有觀眾緣,要有網路討論多人講。因為咁,今次DailyView就用節目開播日9月30號至今嘅網路聲量,以大數據分析網民對咁多參賽者嘅討論熱度,排出十大最受網民關注嘅新星!

DV小教室:網路溫度計透過《KEYPO大數據關鍵引擎》,觀測、爬梳港澳地區近萬個網站、頻道,其中包括新聞頻道、各大討論區、FB、IG以及Blog,從中取得資料樣本數,並以AI語意程式作數據分析。「網路熱度」為主題項目相關的網路posts和comments ,數值愈大代表主題項目的討論度愈高。

10 吳啟洋(812筆)

——Phoebus

《全民造星》第一季冠軍姜濤點名,話吳啟洋最有冠軍相,有佢嘅光環加持,令吳啟洋由節目一開始已經得到唔少關注。今年22歲,理工大學土木工程系Year 4學生,個人IG至今已經累積咗一萬五千位Fans以上!吳啟洋有咩咁吸引?除咗識唱識跳,佢本身係運動健將,身材高大健碩,好有陽光魅力。好多網友都支持佢,希望佢「係濤濤身上學多啲野 ,自己變得更好」,「洋洋院長大人,一定支持你!」

image source:

9 洪助昇(828筆)

——Aiden

有《全民造星II》少女殺手、情歌天王之稱嘅洪助昇,清秀嘅外表,酒粒嘅笑容,184cm嘅身高,為佢吸引咗好多Fans,日日喺網路上力撐佢。洪助昇本身係香港演員,參演過ViuTV劇集《身後事務所》、香港電台電視部同香港消防處聯合製作嘅重頭劇《火速救兵IV》等,真係唱得又演得,多才多藝。網民見佢參加比賽咁辛苦,勸佢「食多d!肥番小小好睇d」, 又話「Anson 勁、勁、勁」,話佢愈嚟愈進步!

image source:

8 羅卓華(834筆)

——Will

羅卓華,音樂才子,本身已經係一位全職結他手,成日都自彈自唱,係舞台上充分表現出佢嘅才華。羅卓華參賽前已經係香港樂團ONEders嘅隊長,平時都好習慣同其他人合作,難怪佢喺Team C咁受歡迎喇!羅卓華嘅實力有目共睹,喺歌唱、吉他同跳舞都有返咁上下水平,難怪咁多Fans支持佢嘅。好似「想入場睇你拎冠軍」、「Will 好真誠、與隊友有火花、繼續向前、一定掂」,相信羅卓華睇完都好感動。

image source:

7 陳樂(906筆)

——Justin

18歲嘅時候,呢個最青春最多夢想嘅人生階段,你做緊咩嘢呢?陳樂就參加咗《全民造星II》,為自己嘅音樂夢行出重要一步。最初果陣,唔少都笑佢係「翻版林師傑」,唔信陳樂咁後生可以做到咩嘢喎。但陳樂並無心灰意冷,用佢嘅實力不斷殺出重圍,而家經過咁多場演出已經無人再睇少佢喇!「Justin,你好有觀眾緣及才華」,「哇陳樂真係好靚仔」,咁多網友都咁講,相信陳樂嘅音樂夢一定唔會完!

image source:

6 丘凱雄(929筆)

——Hugo

《全民造星》第一季亞軍陳卓賢點名力讚,連花姐都話佢係大熱,中泰混血兒嘅丘凱雄,一開始已經備受關注。有網友話佢個樣似劉青雲,又批評佢「面容扭曲」,佢就話希望大家留意佢嘅歌聲,要走實力派嘅路。事實證明,丘凱雄每次唱歌都大受好評,唔少人都話好聽過好多時下歌手。「唔理 Hugo 會唔會繼續比賽,只要將來佢出歌,我都願意買黎聽」,咁有個人魅力,丘凱雄嘅唱功會令更多人聽出耳油。

image source:

5 劉瑞祈(964筆)

——K lau

一句「99個入選200萬個企出嚟嘅細路」,引起好多香港嘅年輕人支持,劉瑞祈霸氣冷酷嘅外表,內藏一顆為夢想熱血拼鬥嘅心。其實睇返記錄,劉瑞祈早就喺香港娛樂公司夢想沙龍娛樂文化有限公司入面,成立ReVe跳唱男子團體出道。好可惜嘅係,正當佢要大展拳腳,就因傷休養。今次參加比賽,係佢永不言敗嘅精神,好多網民都力撐:「睇到你呢幾年嘅努力同經驗,每一下都係型!」、「認真好鍾意聽你rap」。

image source:

4 楊昌鵬(1018筆)

——小魚

年方24,停薪留職嘅ViuTV Writer,楊昌鵬高言「別人笑我太瘋癲,我笑他人看不穿。我會令你刮目相看」。佢個人風格強烈,說話直接自負,好似話隊友「無常識」、對手實力差咁。正因為咁,佢一直都喺網上討論區、ViuTV Facebook專頁入面俾網民「負評」洗版。「好做作啊你,不了」、「您無觀眾緣! 完!講完!」不過,都有Fans力撐楊昌鵬,話不招人妒是庸才,堅持真我,先係做未來大明星嘅本色!

image source:

3 梁德忠(1288筆)

——Tank

之前有份參加《全民造星》第一季嘅梁德忠,今年再度入圍《全民造星II》,佢喺今次比賽之中對比其他人都絕不失色,甚至成為而家嘅大熱門人選。梁德忠上年本身係因為舞蹈員合約被迫退出,而家再次參賽,都係為咗全心全意發揮所長,取得佳績。不過網路上有時對佢都有唔少批評,話佢唱歌一般,但而家佢已經改善咗,難怪有Fans睇完佢表演都讚不絕口:「Tank你唱歌進步咗好多,繼續加油!」

image source:

2 李祉均(1637筆)

——Oscar

李祉均23歲,喺香港演藝學院修讀現代舞系,以出色嘅舞技征服咗評審同觀眾。王貽興曾經對李祉均講過:「保護你最好嘅方法就係唔好畀你入娛樂圈」,皆因佢嘅演出太藝術,怕走入商業大眾反而令佢受傷。不過,好多觀眾偏偏就係欣賞李祉均嘅與眾不同,跳出真我。好似佢自己咁講,表演只係有分好同唔好。「有自己風格最緊要,好多人都支持佢,唔好放棄!」相信李祉均將會為我哋送上更多精彩嘅演出。

image source:

1 張天賦(2432筆)

——MC

張天賦喺《全民造星II》首輪比賽,一首Sam Smith嘅《I’m Not The Only One》,唔單止令評審大力讚揚,陳詠燊話佢「目前為止最有星味的人」,仲引嚟好多網民做咗佢嘅Fans。不過,正所謂樹大招風,張天賦身為網路討論度第一名,自然都有唔少「負評」,批評佢態度差,唔識做人,仲成日遲到。雖然係咁,但佢唱功一流先係最緊要。「唱歌真係超正!唱功好顏值高!」張天賦咁屈機,難怪咁多人講起佢喇!

image source:

分析說明:

本研究資料由《KEYPO大數據關鍵引擎》提供,分析時間範圍為2019年09月30日至2019年11月28日。

網路大數據系統觀測港澳地區上萬個網站頻道,包括新聞頻道、Facebook、Instagram及各大討論區、BLOG等,針對討論『《全民造星II》十大網民最關注新星』相關文本進行分析,並根據網友就該議題之討論,作為本分析依據。

本文分析之結果,非參考投票、民調、網路問卷等資料,名次僅代表網路討論熱度大小,不代表網友正負評價。

推薦文章︰

識飲識食識玩!十大生活Youtuber,Ming仔第幾名?

智慧與美貌並重,香港十大區議員候選美女!

關注我們Facebook專頁
    相關新聞
      更多瀏覽