【史高治叔叔】唔可以沉迷但一定要識 阿女18歲要學識呢件事
2019年12月10日03:17
【史高治叔叔】唔可以沉迷但一定要識 阿女18歲要學識呢件事
【史高治叔叔】唔可以沉迷但一定要識 阿女18歲要學識呢件事

又到年尾,史高治開始多聚餐,通常都係啲客人邀請,聚餐上,點可以缺少紅酒呢?記得史高治初出茅廬之時,對紅酒係一竅不通,不過經過咁多年都識啲皮毛,可以同人哋傾吓紅酒。

葡萄酒出產地分為新世界同舊世界,舊世界係有過千年釀酒歷史嘅地方,包括法國、西班牙、意大利、德國、匈牙利等,而新世界就係大概有100多年釀酒歷史,包括美國、智利、阿根廷、紐西蘭、澳洲等。舊世界葡萄酒口味濃厚豐富,重視土壤係適合種邊一種葡萄,而新世界就比較重視果香,價格亦比較相宜,所以幾受飲酒新手歡迎。

【史高治叔叔】唔可以沉迷但一定要識 阿女18歲要學識呢件事
【史高治叔叔】唔可以沉迷但一定要識 阿女18歲要學識呢件事

記得以前飲酒,史高治覺得好似款款都差唔多,不過飲得多啲,開始都知咩叫好酒。而眾所周知,攝取過多酒精係有害,所以一定要學識點分紅酒,到宜家見到好酒,先會飲多兩啖,否則就做個樣拎杯酒搖吓就算。簡單咁講,一定能夠吸引史高治飲嘅必然係五大酒莊嘅酒。五大酒莊係1855年巴黎萬國博覽會期間,拿破崙三世要波爾多產區中嘅梅鐸次產區實施酒廠分級,當時嘅五百家酒莊就依日照、土壤等因素分為五級,當時只有四間名列第一級,為拉菲酒莊(Chateau Lafite Rothschild)、拉圖酒莊(Chateau Latour)、瑪歌酒莊(Chateau Margaux)和侯伯王酒莊(Chateau Haut-Brion),後來到1973年,木桐酒莊(Chateau Mouton Rothschild)晉升為一級酒莊,於是今天就有「五大酒莊」。

可以嘅話,就盡量記住五大酒莊啲名。不過,記得五大酒莊都未夠,因為五大酒莊都有副牌酒,即係品質最好、最知名嘅先係正牌酒,價格當然係萬萬聲,仲會有人買嚟投資。副牌酒就係遜色一啲,因為會有啲葡萄品質唔夠好去釀成正牌酒,就會釀成副牌酒。所以,唔好見到Lafite就雙眼發光,如果係超市見到百幾蚊就有,你就會知道十成十都係副牌酒,品質完全唔及正牌酒。萬一驚自己唔認得,都認吓Grand Cru Classé呢一行法文,因為只有波爾多先可以係Grand Cru Classé嘅產酒區,最高級就係Premier Grand Cru Classé。但係要記住係Grand Cru Classé先係有列級,而唔係Grand Cru,因為Grand Cru係無列級嘅。

如果真係想飲吓好酒但budget有限,可以考慮吓單公仔紅酒(Chateau d'Armailhac),個樣好易認,有一個人仔,香港人鍾意叫佢「單公仔」。呢間Chateau d'Armailhac喺2001年俾一級酒莊Chateau Mouton Rothschild收購咗,投入多咗資金,又有經驗豐富嘅釀酒團隊幫助,所以可以平民化價格買到,品質都真係算唔錯。如果買到2008同2009年,味道就更好。之前,想俾個朋友試吓單公仔,不過史高治臨急臨忙,剩係買到枝2011年,呢個年份就差啲,即管同朋友試吓差幾多啦。

【史高治叔叔】唔可以沉迷但一定要識 阿女18歲要學識呢件事
【史高治叔叔】唔可以沉迷但一定要識 阿女18歲要學識呢件事

不過無論幾靚嘅酒都好,真係淺嚐就好啦,小則怡情,大則亂性。將來阿囡一到18歲,就要教佢知道咩叫好酒,點樣配搭食物,等佢做個有品味嘅lady之餘,最緊要係識保護自己,知道自己喺咩場合先可以飲,仲要知道自己可以飲咩同飲到幾多。無辦法,做咗人父母,乜都會先諗小朋友。

作者:史高治叔叔(facebook專頁按此)

   後生嗰陣,大學一畢業就入咗大銀行商業部做Sales,跟一班有名有利嘅客人打交道,有時可以跟埋一齊飲飲食食,花天酒地、燈紅酒綠嘅生活,造就今日呢個身經百戰又識玩識食嘅叔叔。不過自從做咗老竇之後,史高治叔叔修心養性,決定將行內鮮為人知嘅見聞,喺專欄裡面一一公開。

想追蹤更多最新最好的親子資訊?請瀏覽我們 親子頭條專頁

關注我們Facebook專頁
    相關新聞
      更多瀏覽