潘蘇通個案「投資啟示」
2020年06月22日03:12

上周,報章財經版大事標題:潘蘇通被追十五億,涉事公司資產遭凍結。

投資名言——高風險,高回報。很多投資者,經常只睇到下一句「高回報」,忽略了上一句「高風險」。高風險,分分鐘你不但輸清光,更可能搞到周身債!

昨晚,與香港老牌地產公司高層「大L」晚飯,傾起潘蘇通。

「佢過去十年,真係好勇!假如地產市道一直如2013至18年咁不停升,老潘真係會發到「把把聲」 !不過,佢這種勇者無懼作風,我 在香港搵食幾十年,一定唔會試,因見過多次風浪,冒勇者必定沒頂!

所以,每次出擊投地或搞大型樓盤,必定計過度過,預計最壞情況如何,才會去馬。自己啃唔落,就同友好行家攜手,分享利潤,也分擔風險!」L哥 杯十八年麥卡倫分析:「潘蘇通的方式,不少內地發展商皆如此, 鋪鋪去盡晒冷,順風順水當然恭喜佢啦,但,世事豈會盡如人意?個市一跌,即變『退潮冇褲 』 !」

潘蘇通2008年收購上市公司廣益國際,易名高銀金融(530),立即兩次供股集資,籌到31億,立即以34億投得啟祥道地皮,興建高銀金融國際中心,2016年再將中心按出,借貸64億投得何文田常盛街地王,一心以為地產會不斷似火箭升空。

豈料, 2018年市道逆轉,老潘搞到要將高銀國際金融中心抵押予長實(1113),問誠哥借102億周轉。

市道轉,潘蘇通的旺勢也轉,常盛街樓盤如今即將入伙,但銷情極度麻麻,不知何日資金才能回籠。屋漏更兼逢夜雨,個人名下的另一天價投資何文田站一期,也因沉降而不知停工到何時。結果, 被中國建築(3311)入稟追收工程費900多萬。

上月,更重創是以70.4億代價出售啟德住宅用地,慘蝕近26億。

如今,再被中國信達(1359)追債15億人仔。

L哥搖搖頭指:「一個高風險投資的教訓,無論大中小投資者,都應明白沒有免費的『高回報』啊!」

經濟觀察/投資王

關注我們Facebook專頁
    相關新聞
      更多瀏覽