蘇樺偉媽媽:無悔有呢個仔!

2021年08月31日03:00
蘇媽接受君如訪問,大談媽媽經之餘,蘇媽亦盡訴當年湊大蘇樺偉所遇到的辛酸經歷。

【星島日報報道】今年39歲的蘇樺偉,曾6次為香港在殘奧奪金,贏得「神奇小子」稱號。回想出世時蘇樺偉因患上黃疸病,徘徊生死邊緣。醫生曾勸蘇媽:「唔搶救佢,你仲有機會生多個!」但蘇媽卻咬緊牙關,堅持將孩子從死神手中搶回來。「我屙出嚟㗎!佢成條生命喺度,有血有肉,你嗌我唔搶救佢?完全唔會諗放棄佢,母性嚟㗎!」慶幸當年懸崖勒馬,造就了今日的「神奇小子」,蘇媽總算苦盡甘來:「好彩我冇放棄佢,今日畀咗咁多光榮我!」

改編自殘障田徑運動員蘇樺偉的電影《媽媽的神奇小子》,自上映以來,贏盡口碑,票房衝破1,200萬元。在戲中飾演「蘇媽」的吳君如,日前親自訪問現實中的蘇媽,君如大讚對方是「偉大母親」,更直言:「其實我每次同偉仔出去場合,我都有啲負擔㗎!如果我哋好似特別關心佢,又係另類歧視。」

因為一場黃疸病,導致蘇樺偉腦部受損,後來更出現四肢痙攣、嚴重弱聽等併發症。偉仔的成長路,注定比一般人難行,在他身邊守護着的蘇媽感受至深。「高高低低乜野都經歷過,好多平常人經歷唔到嘅我都去經歷,依家終於都苦盡甘來,起碼我依家兩餐唔使憂,兩個仔又對我好。」

一路走來,唔少「有心人」伸出援手,昔日蘇媽含辛茹苦湊大偉仔的「神奇」故事,今日被搬上大銀幕,在首映禮上,蘇媽希望邀請的嘉賓名單水蛇春咁長,身旁的君如都笑說:「我哋首映冇咁多飛㗎!」

「因為呢啲人係幫過我,喺經濟上當我好唔掂嘅時候,好似我去兩次奧運,北京同雪梨都係四伯爺畀錢我去,老實講真係唔話得,人哋嫌錢腥咩?我都唔知點報答佢……曾經有好多人幫過阿偉,我唔係擦鞋呀!冇劉德華,佢個名唔會咁響。」

曾經被社會邊緣化的殘障孩子,今日在田徑場上「跑得比任何人都快」。捱過艱苦的半生,蘇媽一講到兒子的成就,就一臉滿足。「我都無悔有呢個仔㗎!雖然係辛苦……我覺得佢喺08年北京奧運攞咗金牌已經完晒夢,佢今生完全冇後悔,金牌同世界紀錄都攞咗咁多……偉仔,你真係今生無悔,我為你驕傲!」

關注我們Facebook專頁
    相關新聞
      更多瀏覽