【投資專欄】2021的投資覺悟:港股市場絕對唔係可以共渡患難的地方,想繼續玩可以點做? (弩飛投資)

2022年01月04日15:31

簡單來講,今年最後都係輸幾個%⋯ 其實本來去到十一月中回報都仲係正負零,但由於最後個半月指數都要跌多10%,整體回報跌去負數都係冇辦法⋯幸好,今年年初將一部份資金轉咗去非股票資產,嗰邊嘅升幅都補償到中港股票嘅跌幅,亦都令到中港股票個base細咗,減低左absolute嘅損失。

雖然今年要輸錢,但係成個過程我係都幾享受,因為正正係呢啲時候先能真正了解到,唔同種類嘅投資方法可以出現咩嘢問題,從中改良自己嘅投資系統。因為喺升市嘅時候,大部份方法都贏錢,好難判斷每種方法嘅優劣,潮退之後先會見到巴菲特着鯊魚戰衣。

以下係2021年嘅市場比我最大嘅覺悟(利申:純分享自己嘅諗法,每個投資者基於唔同嘅能力範圍同長處,應該得出唔同結論)

1)港股唔係「釀紅酒」嘅地方

- 當全世界大部份指數大升嘅時候,得港股挑戰緊疫症嘅低位⋯始終香港嘅市場唔係俾資金聚腳嘅地方,當資金了解到未來有陣痛嘅情況,會寧願先行離場,而非共渡患難(反而資金係A股更願意坐多一陣)

- 但係又唔係代表要唔玩呢個市場,只不過要跟番特性去玩(例如專業拳賽比分數,地下拳賽比凶狠):資金既然走得快,相反湧入既時候亦都好快

2)Beta比Alpha更為可取

- 由投資第一日開始,我一直都喺度思考係股票市場入面,跑贏大市嘅基金經理係「時勢做英雄」定係「英雄做時勢」?換句話講,跑贏大市係因為投資嘅風格啱嗰一年嘅趨勢(食beta),定係選股/出入市嘅能力係決定性(食alpha)?(Note: 雖然今年有唔少中港基金負回報,有做清潔能源嘅基金係有100%以上回報)

- 基於港股唔係「釀紅酒」嘅地方嘅假設,弩飛將來都係傾向做番top down輪動嘅方法,透過基本/技術分析50/50搵返每一年適合當年嘅投資風格,將bottom up跨周期嘅揀股方法佔比減少。因此我相信,係香港市場回報未如理想,唔係因為個股研究做得唔夠深入,而係賽道選得唔夠靚。

- 牛市熊市始終一直同時存在,今年真係仲係有行業穩步向上,而且亦都幾明顯:先有航運業,後有電力股、太陽能、風電、核電。可惜全年對呢幾個行業持倉佔比唔夠大,贏嘅錢用嚟冚番conviction坐貨輸嘅錢(相反好多年前,知識面未夠闊嘅時候,搵到呢類行業反而會膽粗粗All in,而家傾向會持有五六個行業,波動性減少,回報率亦都減少)

3)投資係「AND」而非「OR」

- 有人係股票賺錢、有人係房地產賺錢、有人係crypto賺錢,我哋應該勇於接受不同嘅資產類別,採用「AND」既思維,而非作出「OR」嘅篩選

- 對於一直將大部份資金放係中港股市嘅弩飛黎講,今年真係逼住睇多啲唔同嘅資產類別,係身邊嘅朋友耳濡目染底下,做多咗唔同方面嘅嘗試:

- 由最hit嘅crypto開始(什麼MATIC,AVAX,ADA,LUNA,咩都試吓,雖然每次買完都BJ,但係好彩HODL,竟然有錢賺)

- 除咗NFT之外,原來足球明星閃咭都有價有市,唔單止盲盒價值本身會升,開箱抽中稀有卡,更加係不得了(有人成個首期係哂啲卡度)

- 收購Hifi嘅買家對門外漢vs理解Hifi嘅賣家,出價同態度可以差天同地,令我更深感受到「你嘅知識量斷定左回報率」(幸好弩飛用咗兩個星期去研究,壓得住啲買家⋯)

最後,我諗起布隆伯格(1980年諾貝爾醫學獎得獎者)曾經提到,佢從來不會被失敗嚇倒,因為認為每次失敗只會產生一個新的假設,為下一次成功做好準備。

*文章獲 弩飛投資 授權刊登,原標題為《2021年總結》

免責聲明:本網刊載的所有投資意見,只可作參考用途。讀者在作出投資決定前理應審慎,並主動掌握市場最新狀況。若不幸招致任何損失,概與本網無關。而本集團旗下網站或社交平台的網誌內容及觀點,僅屬筆者個人意見,與本集團立場無關。本集團旗下網站對因上述人士張貼之資訊內容所帶來之損失或損害概不負責。

原文

關注我們Facebook專頁
    相關新聞
      更多瀏覽