親子好去處|召集抹茶控!|香港抹茶主題Café推介

2022年06月29日16:31

召集抹茶控!挑選心水café想同小朋友食飯後甜品兼打卡時,除咗內部裝潢係其中一個標準之外,餐牌都好重要!想食抹茶甜品,但無奈Cafe餐牌得好少選擇,滿足唔到內心對抹茶嘅慾望嘅你都唔使灰心!小編就整理咗3間香港抹茶主題日式café,滿足大家喜好之餘,仲可以喺日式風格嘅店面打卡紀錄時刻!正!

香港抹茶主題Café一覽|3間抹茶主題日式Cafe

■ #1 南豐紗廠THE MATCHA TOKYO

■ #2 灣仔月街Matchali

■ #3 銅鑼灣Via Tokyo

香港抹茶主題Café一覽|1. 南豐紗廠THE MATCHA TOKYO

來自東京表參道的人氣日本品牌 THE MATCHA TOKYO有好多經典抹茶招牌單品,絕對係抹茶控必去之處。繼銅鑼灣分店之後,於南豐紗廠開設首間堂食分店!Café內部裝潢簡約而有格調,影文青相打卡一流!

而THE MATCHA TOKYO嘅抹茶係100%有機天然㗎,茶味香濃,絕對可以食到日式抹茶嘅原汁原味。抹茶設四款上級的原味抹茶可以按個人喜好選擇,並由茶 師以茶道方式即場沖泡,包括:JAPAN PREMIUM(回甘不澀)、TOKYO RICH (新品!濃郁苦甘)、KYOTO UJI(茶香清爽)和 GOKO(醇厚手摘茶)。作為掀起日本抹茶熱潮嘅THE MATCHA TOKYO,佢有唔少人氣抹茶單品值得推介!

1. Matcha Espresso Latte ($48)

THE MATCHA TOKYO嘅抹茶拿鐵 (Matcha Espresso Latte) 絕對係店內人氣之選。佢嘅重點就係用抹茶、牛奶及咖啡打造出三色漸層,多層次口感豐富味蕾。如果你同時係咖啡控就多重滿足!拿鐵咖啡底有兩款全新咖啡豆可供選擇,有機阿拉比卡咖啡豆及危地馬拉咖啡豆,可以按照自己口味作選擇~

2. Matcha Soft Serve Ice-cream ($42)

甜品方面,不妨試下佢嘅超人氣抹茶軟雪糕 (Matcha Soft Serve Ice-cream),香濃嘅抹茶口味配上軟滑雪糕,再在表面灑上抹茶粉,真係超吸引!而南豐紗廠分店更特別增量而唔加價,各位抹茶控絕對可以捧腹而回!

作為抹茶控,齋飲同齋食邊能夠滿足大家嘅對抹茶嘅執著呢?南豐紗廠分店限定設30分鐘茶道工作坊 ,由茶師面授日本茶道,客人可以預約親身體驗日本茶道文化,完成工作坊後仲可獲贈證書,大家不妨帶同小朋友一齊親身感受難得嘅茶道體驗,享受家庭樂!

茶道工作坊

日期: 7 月起逢星期五、六、日

時間:11:00-11:30

所需時間:約 30 分鐘

費用:HK$98

報名方法:致電預約或即場報名(因名額有限,建議致電預約)

*南豐紗廠分店限定

荃灣分店

地址:荃灣南豐紗廠地下 G01 號舖

營業時間:星期一至五:8am - 6pm;星期六日及公眾假期:9am - 8pm

電話:2699 2038

香港抹茶主題Café一覽|2. 灣仔月街Matchali

作為抹茶控又點可以唔識香港本地抹茶品牌Matchali? Machali首間旗艦店決定選址於仔活力四射嘅灣仔星街小區,主打抹茶甜品同輕食,店內歐陸式裝潢亦十分有文青感,店外仲有超愜意室外用餐區,打卡一流,灣仔嘅抹茶控係時候出動啦!

圖片來源:Matcha FB

Matchali採用京都宇治第五代茶園嘅茶道級抹茶,由兩位創始人Laura和Cara前往日本,親自挑選上等茶道級抹茶,再經專業抹茶調配師仔細測量抹茶的份量,絕對係優質兼原汁原味。加上Matchali遵從日本傳統,堅持每杯飲品都即席以人手拂茶,務求帶出100%抹茶精華,客人可以通過The Matcha Bar觀看手拂抹茶特飲的製作過程。

Matchali每款飲品都用健康食材製成,有為素食人士而設嘅純素餐品、減肥人士都可以食嘅無糖餐單。另外仲有各種焙茶抹茶炮製嘅唔同單品。仲新推出全日美食菜單,大家想幾時食都得,咁豐富餐牌,真係唔怕冇選擇啦!

1. 紅莓芒果蝶豆花抹茶拿鐵 $60

今次小編就揀選咗2個Matchali特色抹茶單品,勾起大家嘅「抹茶癮」先!為配合炎炎夏日, Matchali就突破傳統推出紅莓芒果蝶豆花抹茶拿鐵,即席手拂嘅抹茶加上多種清甜夏日水果,絕對係帶給味蕾非一般嘅享受。

2. 純素抹茶軟雪糕 ($48)

素食人士千祈唔好錯過呢款月街旗艦店獨家發售嘅純素抹茶軟雪糕!用天然蔗糖、優質燕麥奶同京都宇治抹茶製成嘅軟雪糕絕對係夏日消暑好幫手,可以選擇隨杯或者脆筒附上,十分友好。

Matchali 更將聯乘香港本地手工茶葉品牌: 茶莊 (Plantation by Teakha),搜羅來自世界各地的優質茶葉並提供各種混茶,茶控嘅你哋有更多選擇了!

Matchali

地址:灣仔月街5號地下

營業時間:星期一至星期五:早上8時至晚上7時;星期六至日及公眾假期:早上9時至晚上7時

香港抹茶主題Café一覽|3. 銅鑼灣Via Tokyo

銅鑼灣的「Via Tokyo」坐落於街角位置,日式的簡約東瀛裝潢,配上淺木色的桌椅,俾人一種悠閒嘅感覺。而佢嘅抹茶雪糕加入來自京都的抹茶粉及北海道3.6牛乳,濃郁甘香,絕對係招牌之一。而Via Tokyo都多次入圍Open Rice全城熱捧甜品店名單,網民都讚「達到了日本的水準」,優質保證!

1. 白玉紅豆抹茶牛乳雪糕 ($46)

呢款白玉紅豆抹茶牛乳雪糕絕對係招牌之一。日本紅豆的甜味配上日式上等抹茶甘澀的味道,為你的味蕾帶來多種享受。而順滑嘅濃郁的抹茶及牛奶味雪糕口感亦十分豐富,絕對係食過就忘記唔到嘅味道!白玉糯米滋亦十分彈牙,加上沖繩黑糖一齊食味道更佳。

2. 三色雪糕窩夫 ($78)

Via Tokyo三色雪糕窩夫共有焙茶味,抹茶味同雲呢拿味雪糕,三種層次豐富嘅口感任你享受,由茶香味最濃嘅抹茶,到不一樣的焙茶,再到甜味嘅雲呢拿,加上招牌白玉及抹茶丸子,抹茶控除咗可以如願享受優質抹茶味之外,仲可以食到抹茶之外嘅味道,多重享受!

Via Tokyo

地址﹕銅鑼灣禮頓道106-126號禮信大廈地下1A-1B號舖

營業時間:星期一至日13:00 - 22:00

資料來源: 家庭生活易

查看原始文章

關注我們Facebook專頁
    相關新聞
      更多瀏覽