陳展鵬讚對手超班 無信心爭獎

2022年11月30日03:00
陳展鵬加入娛樂圈,不經不覺已廿多年。

【星島日報報道】

(星島日報報道)陳展鵬在台慶劇《超能使者》飾演的角色「阿鏈」有笑有淚,由輕鬆幽默至沉重,不但情緒起落變化大,還有時間停頓的超能力,搞笑得來又貼地,外表正經的他,連監製文偉鴻也讚他有喜劇細胞、超視帝水準。

陳展鵬本身好鍾意《超》這部劇,因角色挑戰性較大,至於有沒有喜劇細胞?他說:「起碼觀眾睇得舒服,要令觀眾看到會心微笑不容易,做演員希望多方面嘗試,不想咁快被定型,這個環境下希望求變,一成不變觀眾都乏味,今次的角色自己都好期待。其實好多喜劇演員在戲外都好正經,甚至少說話,好似周星馳平日說話並非如戲中這麼搞笑,早年黃子華在TVB拍劇,見他食飯、飲野及在廠房都好認真攞住劇本研究,埋位拍攝時度出來的對白好正。」

《城寨》班底5度合作

劇中他在天橋底被惡人壓着面貼地吃飯一幕,他指人生到這個位是一個經歷,角色大逆轉跌落人生低谷,劇中角色的經歷好似過了多世的人。拍攝期間疫情非常嚴竣,問他如何突破自己的心理關口?「無諗咁多,雖然好污糟,但要投入角色去演,第一take有點不自在,做得呢行就要專業完成工作,劇中有好多打鬥跌落地的動作,每日沖兩次涼,同山聰有時在公司沖完涼才返屋企。」

若現實中也有超能力,展鵬希望擁有瞬間轉移的超能力,可以去全世界任何地方,甚至月球及火星都得,他笑言有回到過去的超能力也不錯,可以彌補一些遺憾。可以回到過去的話還會否選擇入娛樂圈?他直言:「要諗諗,再行一次條路一定唔同,我諗都會選擇娛樂圈工作,雖然成長過程辛苦,但開心和精采。」

談及他們《城寨英雄》班底已5度合作,還有《隱形戰隊》劇集未推出,問他會否感到悶?他覺得有新鮮的題材及角色便不會悶,無論中西電影及舞台劇,有好多班底合作好耐,班底愈耐愈有默契,他與陳山聰、林子善、唐詩詠及王君馨等合作好開心,大家一齊成長,他和子善及山聰已身為人父,經常交換心得。

睇好林敏驄黃宗澤

2016年憑《城寨英雄》奪得視帝,今年可有信心再封帝?展鵬直言心態已經不同,當年《城》劇好想攞獎,但又好驚觀眾不認同,獎項是一個肯定,沒有人嫌多,過去6年經歷好多,明白人生有幾多個十年。「問我現時攞獎是否有用?可以說不是好有用,頒獎禮年年都有,反而觀眾鍾意個角色,未被睇厭,仍然有機會嘗試不同角色較重要。而且今年對手好強,有林敏驄、黃宗澤及陳山聰等,每位演員都花心機、時間及努力,林敏驄首次拍劇,收視口碑好好;黃宗澤為TVB拍咁多劇未攞過視帝,正所謂手掌是肉、手背又肉,今次要拗手瓜,自己的手瓜不算硬!」

關注我們Facebook專頁
    相關新聞
      更多瀏覽